موصوفى عرفه الشوق

موصوفي عرفه الشوق
و سرق حروف قلمي
بحروفي كتب الشوق
و مهمهوش ألمي
أنا بنكتب لهفة
و اترص كلمة حب
و أمل و فرحة و بيت
لا كتبت ولا غنيت
أنا بتكتب
و اتغنَّى
و ده قصدُه
قصد البعاد يرميني في يَدُّه
يدِّ الهوى اللي كتب
و الامضا من اسمي
موصوفي عرفه الشوق
و سرق حروف قلمي
كان للبعاد
ف القلب تأثيره
شنّ الحروب فيّا
و رفع رايات طيره
دمي اللي سال في الحرب مش مهدور
دم انسكب في الحب
فوق غيره
دم انسكب
في الحب عاش خالد
دم انقلب
حبر و كتب خيره
اللي انكتب ع القلب من صغره
خير القلوب الصبر ع البلوى
خير القلوب
متزيدش ف الشكوى
للعبد فكرُه
و ف أيادي الرب تدبيره
يا رب عالم بيا و بحالي
ف القلب حدوته
في قلب حدوته
كتبتها عليا..
ولا كاتبهالي؟؟
انت اللي قادر
شيلني من همّي
همّ المسافر
و البعاد سِمِّي
حنيت
يا قلب ابكي
و يا عيني ما تشوفي
لمّي الضيا لمّي
لمِّيني من خوفي
و خبي موصوفي
عن الهوى تاني
ليشوفه جواكي
و انا يتسرق قلمي
نكتب
نقوم نتكتب
على الورق تاني
و يختصرنا الهوى
نبقى ف عيون الناس
حبة كلام مرمي
و ميعرفوش الناس
اني كيان أكبر
بس اتسرق قلمي!!