و خدني اليك مكان ما انتَ
و ف عيونك
هعيش ساكت
و غطيني
عن اللي هيسألك عنّي
و غنّيلي
بحبك و انت بتغنّي
و تفهم زيّ ما انا قاصد
و تيجي
ف الخيال حتّى
تاخدني اليك مكان ما انتَ
مكان ما الحبّ ده
عدّى
و غرقني ف حنين صوتك
و أشواقك
و علمني أشوف اسمك
و أشتاقك
لقانا هيتكتب اِمتى؟؟؟
ادينا لربنا مادّه
و قادر
من خلق دنيانا في سِتّه
ياخدني اليك مكان ما انتَ
و تدّيني بايديك ورده
تِنَسّيني
شهور عدّت و انا بعيد
توريني
آلام قلبك ف تنهيد
ورودي ع الوجع شاهد
بفكر فيك
عشان ابكي و عشان اهدا
و دمعي ع الخدود شتى
و خدني اليك مكان ما انتَ
سافرت كتير و انا قاعد
و شفتك ف القمر
و الضِّلّ وقت الحَرّ
لَمَستَك ف النّسيم
و العطر لمّا مَرّ
و في شِعرك
و ف الامضا
و في شنط السّفر
متشالة مِتْحَطَّه
تشيلني من بلد باهته
تاخدني اليك مكان ما انتَ
أنا بدونك سطور شارده
أنا الطير اللي مش قادر يطير راجع
و مش قادر يلبّي نداك
و لو سامع
أنا اللي بعاني م الوحده
و بتقطَّعني آهاتك لميت حته
أنا
مش نفسي
أنا اِنتَ
فخدني اليك...........
مكان ما انتَ
