يعز عاليا فرقتنا

size=18]يعزّ عليّا فُرقتنا
ياأغلى النّاس على قلبي
يعزّ عليّا
و اتمنّى
أكون جنبك
تكون جنبي
عيونك تحكي عن حبّك
كسوفي
يحكي عن حُبّي
و يحلا الكون... بحواديتنا
يعز عليّا فُرقتنا
....
يعزّ عليّا اشوف الشمس في الصُّبحيّه
ع الشباك
و عارفه انّ بشعاع تاني
بتلمس عين حبيبي هناك
وانا
نفسي أشوف عينك
و اكون ويّاك
و اغِير م الشّمس بتخبّط
و لسّه... ما علِّيناش بيتنا !!
يعزّ عليّا فُرقتنا
....
يعز عليّا أتأمّل
ف نور البدر طول الليل
و عارفه
إنّ بدري هناك
مِنَوَّر
صاحي
حيّ
جميل
و نفسي يطولني من نوره
و بدري أطُلّ لجل يميل
و اغِير
م البدر نَوَّر وشه طول الليل
و أَقْرَب
-رغم إنّه ف السّما-
مِنّا...!
يعزّ عليّا فُرقتنا
....
يعزّ عليّا ابُصّ لنفسي ف مرايتي
ألاقي جمالي بيسافِر
و خدّي بهت عليه حُزني
و كان ناضر
و شَعري
ع الخدود طاير
لكن حاير
و عيني تخَبّي حلاوتها
و بتكابر
عشان عينك
ما لمحتنيش بقالي كتير
و قلبي ع البعاد صابر
و مش قادر
يحلّيني ف عيون غيرك
بغِير على نفسي....من غيرنا!
يعزّ عليّا فُرقتنا
....
يعزّ عليّا أمسك قلمي
و اكتب لك عن الأشواق
وانا
عارفه انّ قلبك زيّي
من مُرّ الليالي..داق
و اغِير
من كلّ شيء جنبك
جماد..أو كان من الأحياء
و انا بعيده
و مستنيّه لَمِّتنا....
يعزّ عليّا فُرقتنا
يعزّ عليّا فُرقتنا
يعز عليّا فُرقتنا [/size][/left]

[/center]